శ్రమ పాపమును తొలగించును

మరణపు నీడ లోయను (కీర్తన 23) సృజించినది ఎవరు? మరణమను ఆలోచననే సృజించినది ఎవరు? శోధించుటకు దుష్టుని సృజించినది ఎవరు? శారీరక మరియు మానసిక పరీక్షలను సృజించినది ఎవరు? నా సృష్టీ, నేను సృజించిన సమస్తమునకు, శ్రమతో సహా, నా ఘనతను దొంగిలించి మరియొకనికి ఆపాదించుటకు నీవు తెగించెదవా. నేను సృజించిన సమస్తము నాదే, శ్రమయు అందులో చేరును. అది నాది, మరియు నీవు దాని నుండి, దాని గురించి నేర్చుకొనవలెను.

నన్ను ప్రేమింతుమని చెప్పుకొను మీరందరును సిద్ధపడుడి. మీ శ్రమ ప్రత్యక్షముగానో పరోక్షముగానో పాపము నుండి ఉత్పన్నమగుచున్నది. దీనిని వినుడి! శ్రమ పాపమును తొలగించును; అది అందుకొరకే రూపొందించబడినది. కొందరు పాపము చేయుచునే శ్రమను పట్టుకొని ఉందురు. నీ మనస్సును నెమ్మది చేయుము; నీకు ప్రశ్నలు కలవని నాకు తెలియును. నా మార్గముల గురించి నీకు అపార్థము కలదని కూడా నాకు తెలియును; నా మార్గములు మీ మార్గముల కంటే ఉన్నతమైనవి (యెషయా 55:9).

నేను దీనిని మరల చెప్పునప్పుడు వినుమని కోరుచున్నాను. ప్రత్యక్షముగానో పరోక్షముగానో, పాపము శ్రమను కలిగించును. మింగుటకు మరింత కష్టమైనదేమనగా, నా పరిపూర్ణుడైన కుమారుడు మీ పాపముల నిమిత్తమే శ్రమపడెను! ఇతరుల క్రియల వలన ఒకడు శ్రమపడవచ్చునని ఇది రుజువు చేయును.

వివాహములో ఇది ఎట్లు జరుగునో ఆలోచించుము, ఉదాహరణకు. వాస్తవముగా మీ పాపములు ఇతరులను ప్రభావితము చేయును. నా ప్రజలైన ఇశ్రాయేలు అను శరీరమునకు కూడ ఇదే వర్తించును. అవును, నీ వ్యక్తిగత పాపము అనేకులను ప్రభావితము చేయుననునది గొప్ప బాధ్యతని నాకు తెలియును, అయినను నీవు దీనిని అంగీకరించవలసినదే. ఇది నా వాస్తవికత, మరియు అది మారదు.

దీని గురించి నన్ను ఎదిరించకుము! నా కుమారుడు పాపరహితుడై ఉండియు పాపము నిమిత్తము శ్రమపడినట్లయితే, మీరెంత మాత్రము శ్రమపడవలెను? శ్రమను నీ మనస్సులో దండనగా భావించకుము, బదులుగా పరిశుద్ధపరచుటగా తలంచుము. శ్రమ శుద్ధిచేయును.

హెబ్రీయులకు 2:10లో నా ఆత్మ పలికిన మాటలను చదువుము. "ఏలయనగా అనేకులైన కుమారులను మహిమకు తీసికొనివచ్చుటలో, తనకొరకును తనవలనను సమస్తమును కలిగియున్నవాడు వారి రక్షణకు నాయకుని శ్రమల ద్వారా సంపూర్ణుని చేయుట ఆయనకు తగినపనియై యుండెను." అవును, నీకు శ్రమను పరిచయము చేసి నీలోని దుష్టత్వమును పారద్రోలుట నాకు సంతోషకరమైన కార్యము.

నా దృష్టిలో నీవు ఇప్పటికే మంచు వలె తెల్లనివాడవు (యెషయా 1:18), అయినను, నీవు ఇంకను నీ పాపమును గూర్చి ఎరుకతో ఉన్నావు. ఇంకను శుద్ధి చేయబడవలసినది నీ మనస్సు. "మెస్సీయను నేను అనుకరించునట్లు నన్ను అనుకరించుడి!" (1 కొరింథీయులకు 11:1) అని తడబడకుండ చెప్పగలిగియుండవలెను. శ్రమ దీనిని జరిగించుటకు నిశ్చయముగా సహాయపడును.

నా మార్గములను, నేను పనిచేయు రీతులను, ఆయన సంకల్పము చొప్పున పిలువబడినవారి "మేలు" కొరకు నేనెల్లప్పుడు ఎట్లు పనిచేయుదునో (రోమీయులకు 8:28) వాటిని నీవు ప్రేమింతువని నాతో చెప్పుము. శ్రమయే నా మేలుకు మార్గమని నీవు జ్ఞాపకముంచుకొనగలవా? అది ఫలమును ఉత్పన్నము చేయు విలువైన సాధనము. నా విధానమును స్వీకరించుము; అది నిజముగా నీ మేలు కొరకే.