సమృద్ధిగల జీవితం

వారికి జీవము కలుగుటకును అది సమృద్ధిగా కలుగుటకును నేను వచ్చితిని. (యోహాను 10:10)

Yahshua సమృద్ధిగల జీవితము కొరకు చనిపోయినట్లయితే, ఆయన బలిదానము నీకు నిజముగా ఏమి ఇచ్చినది? సమృద్ధిగల జీవితమనగా ఏమిటి? ఇది శాశ్వతమైన మార్పు చెందవలసిన సమయము. నీ సమృద్ధిగల జీవితము యొక్క నిర్వచనము ప్రధానముగా బాహ్య విషయములపైన, భౌతిక రంగములోని జీవితముపైన కేంద్రీకరించబడినచో, నీవు నిజమైన సమృద్ధిని కోల్పోవుచున్నావని మేమనవలసియున్నది.

నీవు ఒక కొత్త మాదిరిని పరిగణించుదువా? "కొండమీద నీకు చూపబడిన మాదిరి చొప్పున సమస్తమును చేయుటకు జాగ్రత్తపడుము." (హెబ్రీయులకు 8:5) పరలోక సంబంధమైన వాటికి ఒక ప్రతి లేదా ఛాయయైన మాదిరిని బట్టి, గుడారమును (Yahweh ఏలుబడి చేయు నివాసస్థానము) కట్టుటకు Yahweh ఖచ్చితమైన ఆజ్ఞలను అనుసరించునట్లు మోషేకు నిర్గమకాండములో అనేకసార్లు ఆజ్ఞాపింపబడెను. ఎందుకు? ఏలయనగా ఆ మాదిరి పరలోక సంబంధమైన వాటికి ప్రతిగాను, ఛాయగాను ఉపయోగపడును. (హెబ్రీయులకు 8:5)

భౌతికమైనది, ఈ సందర్భములో గుడారము, ఒక మాదిరియా? అవును, మరియు ఇది సమస్త విషయములకును సత్యమే. మన సంపూర్ణ భౌతిక లోకము "నిజమైన వస్తువు" యొక్క ఛాయయే. నిజమైన వస్తువు ఏమిటి? నీ భౌతిక జీవితము నీ ఆలోచనా జీవితము, చైతన్యమైనదిగానేయైనను అచైతన్యమైనదిగానేయైనను, దాని ప్రత్యక్ష ఫలితము. ఏలయనగా అతడు తన హృదయమునందు ఏలాగు ఊహించుకొనునో ఆలాగుననే ఉండును. (సామెతలు 23:7) నీ ఆలోచనలే నిజమైన వస్తువు! నీ ఆలోచనలు నీ భౌతిక లోకమును సృజించును.

ఇక్కడ పరిగణించుటకు నాటకీయమైన విషయమొకటి ఉన్నది; నీ ఆలోచనలు నిజమైనవి, నీవు చూచు లోకము ఛాయయైనది. మనుష్యుని పతనమైన ఆలోచనలు (మనస్సు) పతనమైన లోకమును బయల్పరచినవి. మరియు వ్యతిరేకము కూడా ఆశింపబడుచున్నది! Yahweh కుమారుల, కుమార్తెల వెల్లడి [ప్రత్యక్షత] కొరకు సర్వసృష్టి ఆశతో ఊపిరి బిగబట్టి ఎదురుచూచుచున్నది. (రోమీయులకు 8:19) Yahweh కుమారులు, కుమార్తెలు మెస్సీయ మనస్సును (1 కొరింథీయులకు 2:16) కలిగియుందురు, అది సర్వసృష్టిని విమోచించును. పతనమైన మనస్సు పతనమైన లోకము; విమోచింపబడిన మనస్సు విమోచింపబడిన లోకము!

నీ ఆలోచనా జీవితము కూడా చాలా వ్యక్తిగతమైన విషయమే, ఏలయనగా వేరొకడు నీ మనస్సులో నీకొరకు జీవింపజాలడు. నీ సంపూర్ణ వ్యక్తిగత లోకము అది వ్యక్తమగుటకుముందు మొదట ఒక ఆలోచనయే. సమాధానము, ఆనందము, ప్రేమ, స్థిరత్వము, సమతుల్యత, మరియు శక్తి; ఇవన్నియు మనసు స్థితులు కావా, సమృద్ధిగల మనసు స్థితులు కావా? జీవితమంతయు నీ ఆలోచన యొక్క ఉపఫలితము కాదా?

సమస్త లేఖనసంబంధ కార్యకలాపముల "కేంద్రము"గా యెరూషలేమును పరిగణింపుము? యెరూషలేమనగా "సమాధాన నగరము, సమాధాన పునాది, లేదా సమాధాన స్వాధీనము" అని అర్థము. సమాధానము కూడా నీ సమస్త ఆలోచనా కార్యకలాపముల కేంద్రముగా ఉండవలెను. ఆ మాదిరి (భౌతిక వ్యక్తీకరణ) పరలోక సంబంధమైన వాటికి (ఆలోచనలకు) ప్రతిగాను, ఛాయగాను ఉపయోగపడును. కావున సమాధానకరమైన ఆలోచనలు భౌతిక సమాధానముకంటెను ముందు వెళ్ళవలెను.

హీబ్రూలో "షాలోమ్" అనునది సంపూర్ణతను, పరిపూర్ణతను, ధృడతను సూచించు "షాలేమ్" అను మూలపదమునుండి వచ్చినది. ప్రియమైన బిడ్డా, ఆయన మరణము నీకు ఇవ్వదలచినది ఇదే, సమాధానమే! సమాధానమనగా సంపూర్ణమైన, పరిశుద్ధమైన, స్థిరమైన మనస్సు; Yahweh సర్వశక్తునిపైననే ఎంతగా కేంద్రీకరింపబడిన మనస్సనగా జీవితము యొక్క భౌతిక కోణము ద్వితీయ ప్రాధాన్యతగా మారును. "తండ్రీ, వీరు చేయుచున్నదేమో వీరెరుగరు గనుక వీరిని క్షమింపుము" అని మనస్సు పలుకుచుండగా శరీరము చనిపోగలదు. (లూకా 23:34)

ప్రియమైన బిడ్డా, ఇదే జీవితము. పరిపూర్ణమైన జీవితము! సమృద్ధిగల జీవితము!