"అందరూ పాపులే!" పరిచర్యా? లేక మరణ దెబ్బా?

సర్పసంతానమా! మీరు దుష్టులై యుండి ఎట్లు మంచి మాటలు పలుకగలరు? హృదయమునందు నిండియుండు దానినిబట్టి నోరు మాటలాడును గదా. (మత్తయి 12:34)

ప్రతి మాటతో ఒక మనోభావం బయటపడుతుంది. నీలో ఉన్నది చివరకు నీలో నుండి "పొంగి ప్రవహిస్తుంది." హృదయంలో ఏది ఉడుకుతున్నా అది చివరకు పలుకబడిన మాటలుగా బద్దలవుతుంది. "సజ్జనుడు తన హృదయమను మంచి ధననిధిలో నుండి మంచి వాటిని బయటికి తెచ్చును; దుర్జనుడు తన హృదయమను చెడ్డ ధననిధిలో నుండి చెడ్డవాటిని బయటికి తెచ్చును" (లూకా 6:45) అని మనం ఇటీవలే పరిశీలించాము. నీ అంతరంగ ఆలోచనలు లేదా మానసిక స్వభావం ఎల్లప్పుడూ నీ మాటల ద్వారా ప్రతిబింబిస్తుంది. అవును నిజంగా, నీ హృదయమునందు నిండియుండు దానినిబట్టియే నీ నోరు మాటలాడుతుంది గనుక నీ మాటలు నీ మనస్సు యొక్క ఉద్దేశాన్ని బయటపెడతాయి. నీవు సర్పానివా, లేక మంచిని బయటికి తెచ్చేదానివా?

క్షమాపణకు నీవు అర్హుడవు కాదని, నీ వ్యక్తిగత పాపభారం మోయలేనంతదని, విమోచన సాధ్యం కాదని నీవు నమ్మితే, నీతో నేను చెప్పేది ఇదే, "అందరును పాపముచేసి దేవుడు అనుగ్రహించు మహిమను పొందలేకపోవుచున్నారు!" (రోమీయులకు 3:23) మరియు "మీరు ఇంకను పాపులై యుండగానే మెస్సీయ మీ కొరకు చనిపోయెను." (రోమీయులకు 5:8) బాధపడుతున్న, దీనమనస్సు గల ఆత్మను ఓదార్చడానికి ఉద్దేశించిన ఆధ్యాత్మిక ఔషధం ఇదే. ఈ మాటలు నిజంగా పాపి యొక్క మనస్సాక్షిని చొచ్చుకుపోవడానికి కారణం దీనత్వమే. దీనమైన ఆత్మకు ఔషధం అవసరమని తెలుసు, నిజమైన మారుమనస్సు క్షమాపణను తెస్తుందని గుర్తిస్తుంది. దాని హృదయం మంచిని బయటికి తేవడానికి పండి సిద్ధంగా ఉంటుంది.

అయితే, నీవు పాపం చేస్తూనే, "అందరూ పాపులే!" "నేను రక్తముచేత కప్పబడి ఉన్నాను!" "ఎవరూ పరిపూర్ణులు కారు!" వంటి సాకులతోను అబద్ధాలతోను నీ క్రియలను సమర్థించుకొనుచుంటే, పాపము నీ వాకిటనే పొంచియుండుటయే గాక (ఆదికాండము 4:7), నీ చైతన్య, అచైతన్య మనస్సు యొక్క లోతైన మూలలలోనికి ప్రవేశించి దానిని స్వాధీనం చేసుకొనియున్నది. నీ పాపం నిజంగా మెస్సీయతో ఇలా చెబుతున్నది, "వినుము, నీవు నా పాపములన్నిటికొరకు చనిపోయితివి గనుక దీనిని కూడా జాబితాలో చేర్చుము; అది కూడా కప్పబడియున్నది!" ఇది నిజంగా గర్విష్ఠమైన, భక్తిహీనమైన, గర్జించే మనస్సు. ఏలయనగా సత్యమునుగూర్చిన అనుభవజ్ఞానము మనము పొందిన తరువాత మనమే మనఃపూర్వకముగా పాపము చేసిన యెడల, పాపములకొరకు ఇక ఏ బలియు మిగిలియుండదు గాని విరోధులను [అహంకార ఆలోచనలను] దహించివేయు భయంకరమైన తీర్పు నిరీక్షణయు అగ్నిరూపమైన కోపాగ్నియు మిగిలియుండును. (హెబ్రీయులకు 10:26-27)

నీలో ఏ మనోభావం నివసిస్తున్నది? Yahweh కృపను నీవు ఎంతదూరం నెట్టివేయగలవు? "అయితే పాపము విస్తరించిన చోట కృప అపరిమితముగా విస్తరించెను…?" (రోమీయులకు 5:20) నీవు వెనుకకు మరలలేనంతగా ముందుకు నెట్టివేయగలవా? జవాబు సులభమైనది; జవాబు లేఖనానుసారమైనది. "కాబట్టి మనమేమందుము? కృప విస్తరించునట్లు పాపమునందు కొనసాగుదమా? అట్లనరాదు. పాపము విషయమై చనిపోయిన మనము ఇక దానియందేలాగు జీవింతుము?" (రోమీయులకు 6:1-2)

ప్రియమైన బిడ్డా, వెలుగు, చీకటి తప్ప మరేమీ లేదు. జ్యోతిర్మయుడైన తండ్రియొద్ద చంచలత్వమైనను గమనాగమనములవలన కలుగు ఛాయయైనను లేదు (పరిపూర్ణమైన మానసిక వెలుగులు). (యాకోబు 1:17) ఆయన రాజ్యంలో బూడిదరంగు (రాజీపడిన) ప్రదేశములు (ఆలోచనా క్షేత్రములు) లేవు. చివరకు, నీ నిత్య గమ్యంలో, నీవు వెలుగో లేక చీకటో అయియుందువు. మధ్యలో ఏదీ లేదు.