అధిక కొలత

ఆయన నన్ను విశాలమైన స్థలములోనికి రప్పించెను; ఆయన నన్ను ఇష్టపడెను గనుక నన్ను విడిపించెను. (కీర్తనల గ్రంథము 18:19)

తండ్రీ, నీ ముఖాన్ని వెదకమని నీవు చెప్పావు, నేను వెదికాను. నా తలంపులన్నీ, నా ఉద్దేశమంతా నీకు తెలుసు. భూమి పునాదులకు ముందు నా గురించి ఆలోచించినప్పుడే నీవు అంతా తెలుసుకున్నావు (యిర్మీయా 1:5). నా గురించి నాకంటే నీవు ఇంకా ఎక్కువ నేర్పిస్తున్నావు.

నా హృదయపు ఈ మొర్రను, నాలో మండుతున్న దీనిని నేను స్వరపరచవలసి ఉంది. దీనిని నిద్రావస్థలోకి వెళ్ళనివ్వను. దీని రికార్డు నాకు అవసరం.

నీ ముఖాన్ని వెదుకుతున్నప్పుడు, అన్నీ నీ చేతుల్లో ఉన్నాయనే అవగాహనతోనే వెదికాను. సమయం, ప్రయాణం, ఫలితం, అన్నీ నీ చేతుల్లోనే ఉన్నాయి. తండ్రీ, నీ చేతులను చూడగలగాలనేది నీకు నా మొర. అవి ఎలా ఉంటాయి? నన్ను ఎవరైనా తాకినప్పుడు, అది నీ చేతులేనా? నిన్ను "కనుగొనడం" లోకి నేను అడుగుపెట్టేటప్పుడు, నేను కనుగొన్నానని నాకెలా తెలుస్తుంది? అక్కడ ఒక సంఘటన, ఒక ప్రత్యక్షత ఉంటుందా? వెదకడమే అసలైన కనుగొనడమా? తండ్రీ, నాకు ఇంకా ఎక్కువ కావాలనిపిస్తుంది, దానివల్ల ఇంకా చాలా ఉందని నేను నమ్ముతున్నాను. తండ్రీ, ఇంకా చాలా ఉంది కదా?

నేను ఒప్పుకోవలసినది ఏమిటంటే "అవగాహనను మించిన సమాధానం" (ఫిలిప్పీయులకు 4:7) నేను అనుభూతి చెందుతున్నది కాదు. తండ్రీ, అది ఒక అనుభూతా, లేక ఉనికి స్థితా? లేక రెండూనా?

తండ్రీ, ఈ విషయాలకోసం అసహనంతో, ఆందోళనతో నేను ప్రయత్నించలేనని నాకు తెలుసు. నిన్ను వెదికేటప్పుడు కనుగొనడానికి సరైన విధానం ఒకటి ఉందని నాకు తెలుసు. కనీసం నాకు తెలుసునని నేను నమ్ముతున్నాను.

శాంతి కోసం, ఆనందం కోసం నేను పోరాడే క్షణాలు ఉన్నాయి. గొప్ప బాధలో ఉన్నప్పుడు కూడా నేను స్తుతించి ఆరాధించిన క్షణాలు ఉన్నాయి. ప్రయాసపడడానికి, విధేయతకు మధ్య తేడాను నేను గ్రహించానని నమ్ముతున్నాను. నేను ఇప్పుడున్నదంతా, ఎప్పటికీ ఉండబోయేదంతా, నిన్ను కనుగొనడం మీదే ఆధారపడి ఉందని నాకు తెలుసు.

నీతో మరింత లోతైన స్థలానికి వెళ్ళడానికి నీవు నాకు అనుమతినిస్తావా? తండ్రీ, ఇప్పుడు నేను నిన్ను అడుగుతున్నాను; నీ ప్రేమ, అంగీకారపు తోటకు నీవు మరిన్ని ద్వారాలు తెరుస్తావా? నేను అడగనిదే పొందలేనని నాకు తెలుసు (లూకా 11:10). కాబట్టి, నేను అడుగుతున్నాను, మరియు గుర్తుచేసుకుంటున్నాను, సర్వశక్తిమంతునికి చెందిన అన్ని వాగ్దానాలు ఆయనలో [Yahshua] "అవును" అనేవే, మరియు ఆయనలో "ఆమేన్" అనేవే, సర్వశక్తుని మహిమకొరకు మనద్వారా. (2 కొరింథీయులకు 1:20)

నీ కుమారుని పునరుత్థానం ద్వారా నీవు నన్ను చూస్తూ, ఇప్పటికే నా పట్ల సంతోషంగా ఉన్నావని నాకు తెలుసు, కానీ తండ్రీ, నేను నా పట్ల సంతోషంగా లేను. నేను నన్ను నేను దోషిగా ఎంచుకోను, కానీ కనుగొనేదాకా వెదకవలెనని నాకు తెలుసు. నీ ప్రేమను సంపాదించడానికి నేను వెదకడం లేదు; నీవు నీ ప్రేమను నాకు రుజువు చేశావు. నీవు ఇంకా ఎక్కువ ఉన్నావని నాకు తెలుసు, కాబట్టి ఇంకా ఎక్కువను కనుగొనడానికి నేను వెదుకుతున్నాను. ఇందులో నా విధేయత నాకు శక్తినిస్తుంది తండ్రీ. ఆ శక్తితోనే ఇప్పుడు నిన్ను వెదుకుతున్నాను. దయచేసి తండ్రీ, అధిక కొలతలో నాయొద్దకు రా.